Patay ang isa ka 46 nga lalaki matapos ginbuno sang iya kaugalingon nga manghod sa syudad sang La Carlota, Negros Occidental.
Ang biktima ang ginkilala kay Renante Francisco, 46 anyos, may-asawa, laborer samtang ang suspetsado ang ginkilala kay Rodel Francisco, 36 anyos, may-asawa, lunsay mga residente sa Purok 13, Hacienda Letecia, Barangay La Granja, La Carlota City.
Suno kay P/Lt Col Lowell Garinganao, hepe sa La Carlota City Police Station, ang mag-utod ang naga-inom sang makahulubog nga ilimnon sa balay sang biktima sang Biyernes tubtob sa nagdangat sa mainit nga argumento.
Nagdangat naman sa pagsumbaganay apang natambagan man sang ila nga mga kaingod.
Nagpauli ang suspetsado sa iya nga balay kag sa pagbalik sini siya ang magbitbit na nga kutsilyo nga gingamit sini sa pagbuno sa iya magulang.
Ginhingagaw pa ang biktima dala sa Don Salvador Benedicto Memorial District Hospital para sa pagbulong apang ini ang ginbawian sang kabuhi.
Ang suspetsado ang nagpalagyo naman matapos ang krimen, apang nagsungka man kahapon sang aga, upod sa ila amay.
Sa karun, nakahunong na sa La Carlota City Police Station ang suspetsado kag ginahulat naman kun magapasaka sang kaso ang pamilya sa magulang sang biktima
