Patay ang isa ka lalaki nga nagapangompra sang sapat matapos nga gintiro sang wala matumod nga suspetsado sa Sitio Casipongan, Barangay Carabalan, Himamaylan City, Negros Occidental sang Hunyo 24.
Ang biktima ang ginkilala kay Alyas Jesmar, 36 anyos, kasado kag residente sang nasambit nga lugar samtang duha nga wala makilal-an nga persona ang mga suspetsado.
Sa interview sang Bombo Radyo Bacolod kay Police Lt. Col. Anthony Grande, Chief of Police sang Himamaylan City Police Station, mga alas 3:20 ang takna sang hapon sang Hunyo 24 nagluntad ang shooting incident.
Suno kay Grande santo sa ila nga imbestigasyon, ang biktima ang yara sa bulangan sa nasambit nga sitio sang hinali lang may duha ka persona nga nag-akbay kag nagtiro diri.
Suno sa hepe, una nga naigo sang bala amo ang natuo nga bahin sang liog sang biktima kag ang ikaduha nga igo sang bala ang yara sa natuo nga bahin sang ulo sang biktima.
Gin-finishing pa sang gunman ang biktima kag naigo ini sa agtang antes nagpalagyo.
Dugang pa ni Grande ang ila ginalantaw nga motibo sa pagpatay sa biktima amo ang personal grudge ukon pagdumot.
Nagapadayon sa karun ang imbestigasyon sang mga kapulisan sa nagluntad nga krimen kag ginalantaw ang tanan nga anggulo agud nga matumod ang mga suspetsado kah ang rason sa pagpatay sa iya.
