Patay ang isa ka lalaki matapos nga ginbuno sa Purok Kamatis, Barangay Mambaroto, Sipalay City, Negros Occidental, sang Agosto 30, 2026 sang gab-i.
Ginkilala ang biktima nga si “Eddie,” 32 anyos, lalaki, soltero, laborer; samtang ang ginatudlo nga suspek amo si alyas “Mario,” 42 anyos, kasado, kag isa man ka laborer.
Ang duha ang lunsay residente sa nasambit nga lugar.
Sa inisyal nga impormasyon kag sa pahayag sang menor de edad nga anak sang biktima, natabo ang insidente samtang nagabial sang kahoy si “Eddie” sa ila puluy-an.
Suno sa bata, hinali nga nag-abot ang suspek kag gintulod ang biktima nga nangin kabangdanan sang iya pagkahulog sa salog.
Kasunod sini ginbuno sang suspek ang biktima nga naigo sa natuo nga bahin sang tiyan kag nawala nga kamot kag tudlo.
Matapos sang insidente nagpalagyo man ang suspetsado.
Gindala pa ang biktima sa Sipalay City Infirmary para sa pagbulong, apang gindeklara nga Dead on Arrival.
