Patay ang isa ka lalaki matapos mabun-an kasunod sang indi paghangpanay sa kaingod balay sa Sitio Antiquera, Brgy. Guitubhan, banwa sang Isabela, Nobyembre 17, 2024, sang gab-i.
Ginkilala ang biktima kay Agustin Bajala, 34 anyos, samtang ang suspek ginkilala kay Jose Rene Zamora 54, Driver Security sang BISCOM Sugar Company kag residente sang Sitio Antiquera, Brgy. Guintubhan, Isabela, Negros Occidental.
Sa interview sang Bombo Radyo Bacolod Police Major Joseph Partidas, hepe sang Isabela Municipal Police Station, ginreport sang tanod sang Barangay Guitubhan nga may stabbing incident sa lugar.
Suno kay Partidas santo sa ila nga pagpangusisa sang mga kapulisan magkaupod sa pag-inum ang biktima kag ang suspek kasubong man ang ila nga abyan kun sa diin nagluntad ang komosyon sa tunga nanday Bajala kag Zamora kag naggabot sang patalom ang suspek apang natambagan ang mga ini.
Ang biktima ang nagpauli apang nagbalik nga may dala sang tubo kag liwat nga nagluntad ang kumusyon sang duha, kag didto na ginbuno ni Zamora si Bajala rason nga ini ang na-igo sa nawala nga ilok.
Nadakpan man gilayon ang suspek kag ginpasakaan sang kaso.
Nagpanugyan man si Partidas nga kun mag-inum sa balay nalang agud malikawan ang gamo.
Dugang pa sini nga ang income gikan sa pagtrabaho sa uma ang dapat nga gamiton sa insakto para sa ila nga pamilya.
