Lalaki patay matapos makabunggo sa sementado nga pader samtang nagbyahe sakay sa motorsiklo sa Brgy. Guimbala-on, Silay City

Patay ang 38 anyos nga lalaki nga nagbyahe sakay sa motorsiklo matapos makabunggo sa sementado nga pader sa Hacienda Gamboa road, Brgy. Guimbala-on, Silay City, Negros Occidental, kahapon, alas- 2:00 sang hapon.

Ang biktima ang ginkilala nga si Edgar Legaspi, 38 anyos, single, kag residente sang Hacienda Macamig III, Brgy. Bagtic Silay City, Negros Occidental.

Sa inisyal nga imbestigasyon, nagabyahe si Legaspi halin sa Brgy Patag padulong sa city proper sang nadulaan ini sang kontrol sang iya motorsiklo.

Nakabunggo si Legaspi sa sementado nga pader kag nadagdag sa kalog rason nga nag-agom ini sang nagkalain-lain nga pilas sa lawas.

Gindala pa sa ospital si Legaspi apang gindeklarar nga dead on arrival.