Patay ang isa ka lalaki matapos nga malumos sa daan nga overflow sa Hacienda Bernardita, Brgy. Caduha-an, sa ciudad sang Cadiz kadungan sang selebrasyon sang kapiyestahan ni San Juan De Bautista, subong nga adlaw, Hunyo 24.
Sa interview sang Bombo Radyo Bacolod kay Richmond De Asis, Barangay Administrator sang Barangay Caduhaan, Cadiz City, bangud kapiyestahan ni San Juan De Bautista, ang biktima nga ginkilala kay Jose Borte kaupod ang pamilya sini ang nagkadto sa daan nga overflow sa nasambit nga barangay agud nga magpaligo.
Suno kay De Asis, nagtipon-tipon kag nag-inum inum man ang biktima kaupod ang pamilya apang hinali lamang ini nga naglumpat sa suba.
Suno diri, alas 12:00 ang takna sa nadula ang biktima kag ala 1:00 ang takna sa hapon na nakita matapos maglutaw.
Gintinguhaan pa nga irevive ang biktima apang wala na natabangan pa bangud kapin isa ka oras ini sa idalom sang tubig.
Wala man gilayon makita si Borte bangud ang iya ginlumpatan ang daan nga overflow kag ang natup-an sini ang mabaskog nga current sang tubig.
Wala man naglaom ang mga ini nga may malumos bangud ang biktima ang residente man sang lugar kag masami man nagapaligo sa suba.
Ginalantaw man nga natrap ini sang dalom sang tubig rason nga nadulaan ini sang kabuhi.
Nagpanawagan man ini sa mga pumuluyo nga maghalong ilabi na kun magpaligo sa suba agud malikawan ang kaangay nga insidente.
