Daan nga higut-anon ang ginalantaw nga rason sang pagtiro-patay sa isa ka lalaki sa Purok Malagapas, Barangay Tan-awan, Kabankalan City, Negros Occidental.
Sa interview sang Bombo Radyo Bacolod kay Police Lt. Dennis Melgarejo, deputy chief of police sang Kabankalan City Police Station, ginpahayag sini nga may yara sang nag-inform sa nasambit nga police station nga may nagluntad nga shooting incident sa nasambit nga lugar.
Nagproceed man ang imbestigador sa lugar kag nagagwa sa imbestigasyon nga padulong kuntani ang biktima nga si Edwin Ginaluga, 45 anyos kag residente sa nasambit nga lugar kaupod ang asawa sa ila uma.
Samtang nagalakat sila may nabatian nga lupok ang asawa sini kag sang nakabalikid nakita nalang sini ang bana nga nagahigda na kag dugu-on.
Gindala naman sa Kabankalan District Hospital ang biktima apang gindeklarar nga dead on arrival matapos makaagom sang pilas sa natuo nga bahin sang lawas.
Positibo naman nga ginkilala sang asawa sang biktima ang suspek samtang ini ang nagapalagyo matapos ang ginhimo nga krimen.
Nagapabilin nga at large ang suspetsado kag padayon naman nga ginapangita sang mga kapulisan kasunod sang krimen, kag ginalantaw man ni Melgarejo nga wala sang plano nga magsungka ang suspek.
Daan nga higut-anon ang ginalantaw nga rason sang pagtiro-patay sang suspek sa biktima bangud nakaagi ang mga ini nag-inum kag may nagluntad nga komosyon, kun sa diin mahimo ini ang rason sa pagbantay sang suspek sa biktima sa iya pagpadulong sa ila uma.
