Pilason ang 72 anyos nga lalaki matapos ginlabo sa Sitio Hagonoy, Barangay Punao, San Carlos City alas-8:00 kahapon sang aga.
Ang biktima ang ginkilala nga si Mario Masayon, 72 anyos, kasado, mangunguma; samtang ang suspect amo si Wilson Resurrection, 52 anyos, kasado, mangunguma, lunsay residente sa lugar.
Sa interview sang Bombo Radyo Bacolod kay Police Captain Rodney Sarona, deputy chief of Police sang San Carlos City Police Station, may daan na nga away ang duha angot sa duta, kag may record naman sa Barangay sa kaso sang pagpamahog.
Suno kay Sarona, nagakuha sang kumpay sang tubo ang suspect, sang siya ang ginhaboy sang bato sang biktima.
Gamit ang dala nga sanggot, nagbalos ang suspect kag ginlabo sa likod ang biktima.
Nag-angkon man sang samad sa nawong ang biktima matapos ginpaulanan sang tapungol sang suspect sang ini ang natumba.
Gilayon man nga gindala sa ospital ang biktima, samtang nagsurrender naman ang suspect sa Punao Barangay Hall nga gilayon man nga ginhunong sa San Carlos City Police Station.
