Pilason ang isa ka lalaki matapos gintiro sang wala makilal-an nga persona sa Purok Mahilo-ugyon, Brgy. 35, Bacolod City kahapon sang hapon.
Ginkilala ang biktima nga si Jay Lanza kag residente man sang nasambit nga lugar.
Sa interview sang Bombo Radyo Bacolod kay Police Lt. Marbert Veloso, station commander sang Bacolod Police Station 1, sang nabaton ang report gilayon ang mga ini nagresponde sa lugar sang insidente.
Suno kay Veloso, ang biktima ang naabtan nila nga nga nagapungko kag conscious pa.
Pahayag sini nga gina-alegar nga samtang nagasakay ang biktima sa ginamaneho sini nga motorsiklo, hinali na lamang ini nga gintiro sang wala makilal-an nga suspetsado.
Ang biktima ang gilayon man nga nagsulod sa isa ka balay matapos maka-angkon sang pilas, samtang ang suspect ang nag-atras kag nagpalagyo sa nasidlangan nga bahin sang lugar.
Ang suspek nga nagtiro sa biktima ang may tabon sa nawong.
Ang biktima ang nagapabilin sa ospital kag natalana nga ipaidalom sa surgery.
Padayon ang imbestigasyon sang Bacolod Police Station 1 agud nga matumod ang motibo sa pagtiro sa biktima kasubong man makilal-an ang suspetsado.
Ginpahayag sang Barangay Kagawad sang Barangay 35, Bacolod City nga sa nakuha sini nga impormasyon, ang biktima sa shooting incident kahapon ang may yara na sang record sa pagpangawat.
Sa interview sang Bombo Radyo Bacolod kay Barangay Kagawad Herbert Baker, madamo na ang nagreport nga ang biktima nga si Jay Lanza ang imbulbado sa pagpangawat, apang wala naman sang impormasyon nga imbulbado ini sa illegal nga druga.
Nakahelmet naman ang gunman samtang ang biktima ang wala nagahelmet samtang nagadrive sang motorsiklo.
Suno kay Baker padulong ang biktima sa balay sang iya tiya, kag ginapark sini ang motorsiklo sa atubang sang ila balay sang siya ang ginpalapitan sang nakamotorsiklo nga suspect kag ginluthang.
Tatlo man ka lupok ang nabatian sang mga ini kun sa diin ang biktima ang naigo sa butkon, kag ini ang nag-ayo sa manghod sang Barangay Kagawad nga siya ang pasudlon.
Ginpakamaayo man sang Barangay Kagawad nga wala na nagsulod ang suspetsado bangud yara man sa balay ang iya mga hinablos.
