Pilason ang isa ka lalaki matapos gintiro sang duha ka lalaki sa Sitio Camayatan, Purok 7, Barangay Poblacion, banwa sang Cauayan, sang Hulyo 3 sang gab-i.
Ginkilala ang biktima kay Reynaldo Cumawas, 47 anyos, laborer, resident sang Sitio Camayatan, Purok 7, Barangay Poblacion, Cauayan, Negros Occidental.
Samtang ang ginapahayag nga mga suspek amo sanday Edgar Rivera, 60 anyos kasado, laborer, residente sang Sitio Camayatan, Purok 7, Barangay Poblacion, Cauayan, Negros Occidental kag Pedro Sotes, Filipino, 44 anyos, kasado, Lending Collector, residente sang Sitio Camayatan, Purok 7, Barangay Poblacion, Cauayan, Negros Occidental.
Sa interview sang Bombo Radyo Bacolod kay Police Lieutenant Colonel Lowell Garinganao, hepe sang Cauayan Municipal Police Station, nagapabilin nga at-large ang mga suspek sa shooting incident nga nagluntad sa nasambit nga banwa.
Suno kay Garinganao, nagpatigayon man sila sang hot pursuit operation matapos nga magpablotter ang biktima apang wala nila naabtan ang mga suspect nga nagpadulong sa nabukid nga bahin sang banwa.
Ginpahayag sang hepe nga ang suspek kag ang biktima ang magkaingod lamang kag may yara sang wala pag-intsindihanay bangud sa duta.
Wala sang recoveries sa crime scene gani ginadudahan nga caliber .38 ang gingamit nga armas sa pagtiro sa biktima kun sa diin nakaagom sang pilas sa tiil.
Ginapahayag nga isa sa mga suspek ang bayaw sang biktima samtang ang isa naman ang anay katapo sang RPA-ABB.
Sa karun nagahulat nalang ang mga kapulisan sang affidavit halin sa biktima agud nga mapasaka ang kaso batok sa suspek.
