Arestado ang isa ka persona matapos nga nagpamukpok sang bato kag nagpang-agaw sang tricycle sa Bacolod Economic Highway Hda Gonzaga, Brgy Mansilingan Bacolod.
Sa interview sang Bombo Radyo Bacolod kay Polic Captain Dax Santillan, station commander sang Bacolod Police Station 7, ang nadakpan nga si ALMER ang nagpakuno-kuno nga pasahero kag nagpadul-ong sa Hacienda Guanzon kag pag-abot sa nasambit nga lugar ginlampusan niya ini kag sang nalipungan, ginhal-id niya ini sa higad sang dalan kag gintaban ang tricycle sang biktima antes nagpadulong sa ciudad sang Bago.
Nadakpan naman sang mga kapulisan sang Bago City Police Station ang suspek kag narecover man ang tricycle kag yara sa karun sa kustodiya sang nasambit nga police station.
Ang biktima nga nagaedad sang kapin 30 anyos ang nakita sa hilamunan nga may samad sa ulo ang gindala gilayon sa Corazon Locsin Montelibano Memorial Regional Hospital kag sa karun ang nagapaayo.
Nakahunong na sa Bacolod Police Station 7 ang suspetsado kag magapangatubang sang nagakaigo nga kaso.
