Arestado ang 56-anyos nga lalaki sa buybust operation nga ginpatigayon sang Bago City Police Office sa nagapadayon nga kampanya batok sa iligal nga droga.
Ang suspetsado ang ginkilala kay Romeo Gonzaga, 56 anyos, residente sa Barangay 2, siyudad sang Bacolod.
Nadakpan ini sa ginpatigayon nga buybust operation sang mga katapo sang Bago City Police Station sa Prk. Kawayanan, Brgy. Taloc, Bago City.
Nakuha gikan sa paghinakop sang suspetsado ang tatlo ka transparent plastic sachet sang gina-alegar iligal nga droga, isa ka green nga lighter, isa ka unit sang cellphone, isa ka unit sang motorsiklo kag P1,000 nga marked money, samtang may dugang pa nga P126 nga gina-alegar kita halin sa pagbaligya sang iligal nga droga.
Ang nasambit nga droga ang nagabug-at sang isa ka gramo nga may estimated street value nga P5,000.
Ang suspetsado ang yara na sa karon nakahunong sa Bago City Police Station kag pasakaan sang kaso nga paglapas sa Republic Act 9165 ukon comprehensive dangerous drugs act 2002.
Madumduman nga ginapahayag sang mga katapo sang kapulisan nga bisan masako sila sa COVID precautionary measures, magapabilin gihapon kag indi maga-untat ang kampanya batok sa iligal nga droga.
