Pagaistoryahan pa sang mga transport group kun pila ang saka sa plete nga luyag nila ipetition antes ifinalize sa Land Transportation Franchising and Regulatory Board.
Subong amo ang ikapito na nga semana sang asod-asod nga pagsaka sa presyo sang produktong petrolyo.
Sa interview sang Bombo Radyo kay Albert Villanueva, chairman sang Sentrong Samahan ng Tsuper at Operators (SSTONE), ang ini nga problema ang maka-apekto sa tanan apang nagapanguna gid diri nga apektado amo ang sektor sang transportasyon.
Suno diri, magasturyahanay pa sila nga mga transport group kun pila ang ibutang nga saka sa plete, kaangay na lamang kun ang presyo sang gatong yara sa P60 tubtob P69 sa kada litro ukon P70 tubtob P79, pila ang mahimo nga saka sang plete.
Ila ini una nga sturyahan antes ipadangat sa LTFRB.
Apang, pahayag ni Villanueva, antes mafinalize ang petition mangayo anay ini sang suhestyon sa Local Government Unit sa paglaum nga may yara sang mahatag nga solusyon ukon suhestyon ang ciudad.
Ini bangod aminado man si Villanueva nga apektado man ang ila pamilya sa pagpasaka sang plete.
Sa bahin naman sang Blanket Subsidy nga ginpromisa ni President Marcos Jr nga P3 billion, pamangkot ni Villanueva kun mahatagan ayhan ang mga drayber sini kag paano nga nalakip diri ang mga pribado nga korporasyon sa makabaton sang subsidiya.
