Gin-athag sang pinuno sang Land Transportation Office (LTO)-Bacolod City nga regular operation lamang ang ila nga ginpatigayon subong nga adlaw baliskad sa nagwa nga impormasyon nga may yara sila sang patigayunon nga one time bigtime operation.
Sa interview sang Bombo Radyo Bacolod kay Renato Novero, nagroving sila kaina sang aga antes pa man nagplastar sa isa ka mall sa syudad sang Bacolod kun sa diin may ginparahan sila nga pribado nga salakyan, motorsiklo, taxi, traditional kag modernized jeepney agud tsekyaron ang OR/CR; franchise kag rehistro.
Suno kay Novero madamo na sila sang nadakpan, isa na diri ang traditional jeepney nga nagabiyahe sa routa nga Sincang-Airport apisar nga expired na ang OR/CR kag prangkisa samtang wala man ini nakarehistro para sa modernization.
Magluwas nga gin-impound ang jeepney unit, ginkuha pa ang driverse license sang nasambit nga driver.
Suno kay Novero, ang PUJ units nga madakpan nga wala sang nagakaigo nga papeles kaangay sang prangkisa apang nagapick-up gihapon sang pasahero ang mahimo nga makabig nga culurom, kag ang mga ini ang indi na makabiyahe kag magabayad pa sang multa nga P120,000.
Ginpahayag man sini nga wala man sila sang ginapili sa ginapangdakop bangud bisan ang modernized jeepney nga wala nagasuksok sang seatbelt ang driver kag indi rehistrado ang konduktor ang ila man nga ginadakop.
Suno sa pinuno sang LTO-Bacolod, sila ang masami man nga nagapatigayon sang kaangay nga operasyon.
