Aminado ang pinuno sang Land Transportation Office Licensing Center sa Bacolod City nga bentaha para sa ila kag sa publiko nga nagatransact sa ila ang pagpasar sang layi nga nagaconvert sang opisina bilang Regular Licensing Center nga pagatawgon na bilang Negros Occidental Licensing Center.
Kahapon, ginkumpirmar ni Bacolod City Lone District Rep. Greg Gasataya nga isa na ka layi ang Republic Act 11818.
Bangud sini, igalakip na sang secretary sang Department of Transportation sa mga programa sang ahensya ang operationalization sang Negros Occidental Licensing Center kag ini ang igalakip sa tuigan nga General Appropriations Act.
Suno kay Susan Guara, bentaha ini bangud ang Negros Occidental Licensing Center ang mangin isa na gid ka regular agency gani may kaugalingon na ini nga plantilla positions.
Santo sa report, 27 ka plantilla positions ang iga-create para sa licensing center apang pareho man gihapon nga transactions ang ila iga-cater.
Bangud independent office na ang licensing center, mahatagan na ini sang gobyerno sang mas dako nga pondo para sa procurement sang mga equipment.
Sa karon, isa sa mga problema sang licensing center ang mahina nga internet connection nga nagaapekto sa computerized system sang transaction sang mga kliyente.
Ginakalipay ni Guara nga napasar na ang layi bangud sa bilog nga Region 6, Iloilo kag Negros Occidental na ang may regular nga licensing center.
