Magapatigayon sang libre nga theoretical driving course ang Land Transportation Office District Office sa Bacolod sa Mayo 15 tubtob 16 kag sa Victorias City sa Mayo 11 tubtob 12. Sa interview sang Bombo Radyo kay LTO Head Renato Novero, ang nasambit nga aktibidad ang patigayunon kadungan sang Founding Anniversary sang LTO.
Suno diri, sa lobby sang Bacolod City Government Center patigayunon ang theoretical driving course kag may maximum participants nga 200 ka mga persona samtang sa City Gymnasium naman patigayunon ang sa Victorias City kag may maximum man nga 200 ka mga participants.
Suno kay Novero, ang theoretical driving course ang isa sa mga requirements agud makaproseso sang drivers license ilabi na sang student permit kag kun sa driving school ini kuhaon, may balayran nga P1,000. Lauman naman suno sa iya nga magapatigayon sila sang kaangay nga aktibidad sa nagkalain-lain nga banwa kag ciudad sa probinsya.
Sa mga luyag magparehistro, sarang nga makapadulong sa City Administrator’s Office sang Bacolod kag Victorias City.
