Landslide, nagluntad sa banwa sang Cauayan kahapon; Dako nga bato, nagbalabag sa dalan

Nagluntad ang landslide sa Purok 2, Sitio Mayab, Brgy Caliling, banwa sa Cauayan, Negros Occidental kahapon sang hapon.

Sa interview sang Bombo Radyo kay Brgy Kagawad Erlinda Dorimon, nakabaton sila sang impormasyon nga may landslide nga nagluntad sa Sitio Mayab kag ila ini gilayon ginpadulongan.

Suno diri, may isa ka dako nga bayo nga nadagdag kag nagtupa sa dalan kun sa diin halos nasakop sini ang bilog nga dalan.

Nagbinuligay naman ang mga pumuluyo agud limpyohan ang dalan agud maagyan sang mga gagmay nga motorsiklo.

Apang ila pa ginabantayan kun mahulog man ang isa pa gid ka dako nga bato nga yara sa babaw bangod mahumok na ang duta.

Ila naman ginreport sa Local Government Unit ang natabo agud mapakuha ang dako ang bato sa dalan.