Nagdangat sa kapin 200 ka mga individwal ang gin-evacuate sa probinsya sang Negros Occidental matapos nga magbubo ang madamol nga ulan dala ni Bagyong Dante.
Sa interview sang Bombo Radyo Bacolod kay Dr. Zeaphard Gerhart Caelian, pinuno sang Provincial Disaster Management Program Division (PDMPD), ang banwa sang Binalbagan, Isabela kag Hinobaan ang nakareport nga may yara sang evacuees.
Sa banwa sang Binalbagan, nag-evacuate ang siyam ka pamilya ukon 32 ka mga individual nga residente sang Barangay Payao kag napulo ka pamilya ukon 25 ka mga indibidwal sa Barangay Bagroy.
Indi naman malabayan ang Barangay Amontay-Barangay Santol Road sa banwa sang Binalbagan kasunod sang landslide sa Sitio Omot, Barangay Santol.
Sa banwa sang Isabela, nag-evacuate man ang 111 ka mga tawo sa Hacienda Barila, Barangay Magsaysay, Barangay 8 kag Barangay Guintubhan bangud sa pagbaha apang madasig naman nga nagsubside ang tubig.
Sa banwa naman sang Hinobaan, may nag-evacuate man nga anom ka pamilya nagikan sa Barangay Asia kag 48 ka pamilya nagikan sa Barangay Bulwangan.
Wala naman sang missing kag nasamaran sa mga ginpang-evacuate.
Nagalaom man si Caelian nga wala na sang may magadugang sa mga LGUs nga may ginpang-evacuate.
Nagpahanumdom man ini sa mga pumuluyo nga padayon nga mag-aligmat samtang nga nagapadayon ang pagbubo sang ulan nga dala ni Bagyong Dante.
Aminado naman si Caelian nga bisan madamol man ang pag-ulan sa northern Negros nga ginpaidalom kaina sa tropical cyclone wind signal number 1, wala naman sang narecord nga pagbaha sa norte nga bahin sang probinsya.
Suno kay Caelian, dako ang nabulig sang dredging operations nga ginpatigayon sa mga suba sa northern Negros.
Madumduman nga duha ka dredger ang ginpadala sa northern Negros agud mapadalom ang mga suba diri.
