Yara na sa maayo nga kahimtangan ang isa ka lapsag nga babayi nga nasapwan sa dalan padulong sa Purok Hda Esperanza, Barangay General Luna, Sagay City, Negros Occidental kahapon, Hunyo 28.
Sa interview sang Bombo Radyo Bacolod kay Police Lt Col. Alvimar Flores, hepe sang Sagay City Police Station ang lapsag ang nakita ni alyas Judy Ann kag gindala sa Alfredo Maranion District Hospital agud nga maasikaso.
Suno kay Flores, suno sa nurse, ang lapsag ang wala pa sang 24 oras nga ginbun-ag.
Suno diri, ginpahayag sang nakasapo sa lapsag nga may yara siya sang nakita babayi nga kag sang nasiguro nga nakuha na ang bata nagdalagan ini.
Sa karun padayon pa ang imbestigasyon sang mga otoridad agud matumod ang nagbilin sa lapsag sa higad sang dalan.
Nagpanawagan man ini sa nanay ukon pamilya sang lapsag nga kun kadtuan nila ang bata yara lang ini sa hospital ukon mahimo man makig-angot lamang sa Women and Children Protection Desk (WCPD) sang Sagay City Police Station ukon sa City Social Welfare and Development Office sang ciudad.
