Ginahibalo pa sang mga kapulisan kun sin-o ang iloy nga nagbilin sang isa ka lapsag nga babayi sa gwa sang simbahan sa Barangay Inayawan, Cauayan, Negros Occidental.
Suno kay P/Staff Sgt. Mary Ann Gico, Head sang Women and Children’s Protection Desk (WCPD) sang Cauayan Municipal Police Station, Pebrero 11, alas-9:30 sang gab-i, sang nasapwan sang pastora sang True Life Ministry ang lapsag nga naputos sang dark colored nga jacket, kag wala sang iban nga panapton nga yara sa atubang sang gate sang simbahan.
Suno sa pastora nga ginkilala kay Rita Vicentino, nakabati ini sang tingog sang babayi nga nagapanawag sa gwa sang simbahan, apang wala na sini maabtan sang maggwa kag nakita nalang ang babayi nga lapsag nga naputos sang tela.
Samtang nakakita naman ini sa malayo sang isa ka slim nga babayi.
Nakaapid ang umbilical cord sang lapsag gani ginapatihan nga bag-o lang ini ginbun-ag.
Nagpangayo sang bulig ang pastora sa Municipal Social Welfare and Development (MSWDO) sang Cauayan samtang gilayon man nga ginreport sa kapulisan pagka-aga.
Nagresponde ang mga katapo sang Cauayan Municipal Police Station kag nagpadulong sa barangay, agud nga hibaluon sa mga opisyal kun may-ara sang residente sa lugar nga nagabusong kag natalana nga magbata.
Kalakip sa ginatsekyar sang mga ini ang listahan sang prenatal check-up sa nasambit nga barangay.
Ginturn-over na sa Registered Foster Parent nga nahamtang sa ciudad sang Himamaylan ang lapsag agud nga mag-atenderan.
