UPDATE–Nabalik na sa iya mga ginikanan ang 17 days old nga lapsag nga ginkuha sang isa ka babaye sa ciudad sang Bacolod kahapon.
Santo sa kumpirmasyon ni Police Major Jovil Sedel, hepe sang Police Station 1, alas-9:45 sini nga gab-i sang ginturn-over sang magulang sang suspetsado ang lapsag matapos nga ila ini ginkuha sa Hacienda Defuego Dos, Brgy. Dos Hermanas, ciudad sang Talisay.
Ginkilala ni Sedel ang suspetsado nga si Angelie Gonzales, 23-anyos sang Hacienda Defuego Dos, Brgy. Dos Hermanas, Talisay.
Madumduman nga ginpalagyo ni Gonzales ang lapsag nga si Baby William gikan sa iloy sini nga si Mary Grace Goto, 24-anyos sang Hacienda Teresita, Barangay Granada, Bacolod City matapos ini nga nagpakilala nga ila himata sang sila ang nagkitaay sa Corazon Locsin Montelibano Memorial Regional Hospital.
Nahibaluan nga mismo ang iloy ni Gonzales ang nagpahibalo sa utod sini sa Bacolod sa iya pagkuha sa bata.
Samtang santo naman sa interview sang Bombo Radyo Bacolod sa magulang ni Gonzales nga amo ang nagbalik sang lapsag, wala sila nakahibalo kun anu ang intensyon sang ila manghod sa iya ginhimo.
Apang suno diri, depressed si Gonzales matapos nga nahulugan pila na ka bulan ang nakaligad.
Suno pa diri, naglain ang paminsaron sang suspetsado humalin sang nahulog ang apat ka bulan niya nga ginabusong.
Nahibaluan sa utod nga may problema sa matres ang suspetsado kag ini man ang rason kun nga-a nagapa-check up ini sa regional hospital.
Desidido man ang magulang nga ibalik nila ang lapsag bangud nakahibalo sila nga masakit sa matuod sini nga iloy ang natabo.
Samtang nagahimos sila alas-7:00 sini nga gab-i agud dal-on na sa Bacolod ang lapsag, nagpalagyo naman si Gonzales, kag ini karun ang ginaproblemahan sang pamilya.
Samtang apisar nga nabalik na ang iya bata, desidido naman ang iloy ni Baby William nga pasakaan sang kaso si Gonzales.
Naghilibion man ang iloy nga Goto sang nakita na si Baby William nga gina-uyatan kag ginbalik sa iya sang magulang ni Gonzales.
