Ginatumod pa sang Bacolod Police Station 7 kun ano ang rasun sa pagbilin sang 22 anyos nga iloy sa iya bag-ong bun-ag nga lapsag sa hilamonan sa Hda. Guanzon, Barangay Mansilingan, Bacolod City kagab-i.
Sa interview sang Bombo Radyo Bacolod kay Police Capt. Greeky Cayao, station commander sang Bacolod Police Station 7, bag-o gid lamang nakagwa ang 22 anyos nga iloy sa pribado nga lying-in clinic sa nasambitan nga Barangay, bangod Agosto 20 ang nakabutang sa birth certificate sini.
Ini ang ginhimo sang iloy, sang maghalin ang iya partner agud magbakal sang bulong kag mga gamit sang bata.
Ang lapsag ang naputos man sa lampien, may katupad nga beberon, gatas kag tubig sang ini ang makit-an sang mga kabataan nga nagapanulo sang damang.
Nagdangop naman ang mga ginikanan sang iloy, kag luyag nga I-claim ang lapsag.
Paathag ni Cayao nga i-uli man sa pamilya ang lapsag apang sila ang ipaidalum sa monitoring.
Gina-imbestigaran pa nila ang rasun sang iloy, apang sa inisyal nila nga imbestigasyon, bisan ang iloy ang nakibot nga ginbilin sini ang iya nga baby.
Suno kay Cayao, ginalantaw ang posibilidad nga nagasuprer sang post partum syndrome ang iloy.
Ang bana sini ang nagatrabaho samtang ang iloy ang natalana palang nga mag-eskwela sa kolehiyo, samtang ini ang ikaduha naman nila nga bata.
