Isa ka bag-ong bun-ag nga lapsag nga babayi ang wala na sang kabuhi sang nasapwan sang garbage collector samtang yara na sa landfill ukon dumpsite sang basura sa syudad sang Talisay.
Suno kay P/Lt Marion Vicente Buenaflor, Deputy Chief sa Talisay City Police Station, nakita sang nasambit nga garbage collector ang isa ka karton nga nahigot pa sang straw.
Bangod sa pagpinsar nga mahimo may importante nga butang sa sulod sang karton gani iya ini nga ginbuksan.
Apang nahamtang sa sulod sang karton ang isa ka eco bag nga naga-unod sang lapsag nga naka-apid pa ang umbilical cord.
Suno kay Buenaflor, ang truck sang basura ang naglibot na sa syudad sang Talisay antes magpadulong sa dumpsite gani indi pa matumod kun sa diin naghalin ang karton nga naga-unod sang bag-ong bun-ag nga lapsag.
Dugang pa nga nagasamo-samo na ang mga basura nga yara sa dumpsite.
Sa karun padayun naman ang follow-up investigation sang Talisay City Police Station natuhoy sa mga lugar nga nalabayan sang garbage truck.
Ang bangkay sang lapsag ang yara na sa Manapla Funeral Home kag ginabanta nga ang Department of Social Welfare and Development nalang ang magapalubong sa lapsag.
