Nasapwan ang wala na sang kabuhi nga lapsag sa Purok Bansa, Barangay Central Tabao, Valladolid Negros Occidental kaina alas-5:30 sang aga.
Sa interview sang Bombo Radyo Bacolod kay Rona Traygo, isa ka manunudlo, samtang siya ang nagapanilhig sa ila ugsaran kag magahakot na kuntani sang sagbot natingala ini nga mabug-at ang iya ginasilhig kun sa diin didto na sini natalupangdan ang buhok sang lapsag.
Gilayon naman sini ginpahibalo ang iya bayaw kag kaingod samtang ila man nga ginpahibalo si sekretarya sang Barangay.
Suno diri, ini ang una nga kahigayunan nga may kaangay nga hitabo sa ila.
Pahayag pa ni Traygo nga alas-2:00 sang kaagahon nagbugtaw ini para pangihi kun sa diin nabatian sini ang makadali nga pagtinaghol sang mga ido.
Sa iya paglingi sa bentana, nakita sini ang duha ka persona, apang indi na sini masegurado kun ang mga ini ang babayi ukon lalaki.
Isa sa mga ini ang nagikan sa lugar kun sa diin nasapwan ang lapsag samtang ang isa naman ang nagahulat sa unhan.
Ginalantaw sini nga ang nasambitan nga mga persona amo ang nagbilin sang lapsag.
Sa pihak nga bahin sa interview sang Bombo Radyo Bacolod kay Barangay Kagawad Sanita Gegonia, gilayon man ini nga nagresponder sang ginsugid sa iya sang sekretarya sang barangay nga may nasapwan nga lapsag.
Sang makumpirmar gilayon man sini nga ginreport sa Valladolid Municipal Police Station.
Ang lapsag ang nagakulob kag nagadupahon samtang ini ang ginpakaya na lamang sang mag-abot ang nurse gikan sa Municipal Health Center.
Didto nila nakita nga babayi ang lapsag kag nagalambod ang umbilical cord sa liog.
Sa assessment sang nurse, siyam ka bulan na sang ginbun-ag ang lapsag apang makahalanusbo nga kaangay nga ginlalas lang ang pag-utod sa pusod sini.
Bangod makadali lang sang magtaghol ang mga ido kag gilayon man nga naghipos, ginalantaw sang mga ini ang posibilidad nga kilala na sang mga ido ang nagbilin sang lapsag.
Makaluluoy man ang sitwasyon sang lapsag bangod napuno na sang balas ang guya sini kag ginasubayan na.
Nagapanimaho naman sa lugar gani ginalantaw sini nga patay na ang lapsag sang ini ang ginbun-ag.
Samtang may maong nga sexy shorts naman nga nakita sa kilid sang lapsag nga mahimo amo ang gingamit sa pagputos sini, gani ginalantaw sang mga ini nga teenager ang nagbilin sini.
Ang lapsag ang gindala sa Valladolid Municipal Health Center samtang mahimo nga tsekyaron man sang mga ini ang record sang mga nagabusong kag natalana na nga magbata.
Ginalantaw man ni Gegonia nga ila man nga ipamonitor sa tagsa ka Barangay Health Worker sang kada purok ila mga sakop nga nagabusong sa Barangay Central Tabao.
