Nagapasalamat ang pinuno sang Bacolod Traffic Authority Office (BTAO) sa mga nagpalab-ot sang simpatya kag mga humalin sadto nagsuporta sa iya amay nga si late Negros Occidental Governor Daniel ‘Bitay’ Lacson Jr. nga nagtaliwan kagab-i sa edad nga 77.
Sa interview sang Bombo Radyo Bacolod kay Patrick Leonard Lacson, sang nagapungko bilang chairman sang Government Service Insurance System (GSIS) ang ila amay sa administrasyon ni late President Benigno ‘Noynoy’ Aquino III, nagadeteriorate na ang pinsar sini.
Ini bangod sa balatian nga parkinson’s disease kag dementia.
Apang sa ulihi, ang ila amay ang gintubuannaman sang brain tumor nga gintunaan sang iya kamatayon.
Sila ang magatalana sang haya sumugod alas-10:00 bwas sa aga sa Acropolis Garden sa Barangay Bata, Bacolod City tubtob sa Miyerkules.
Isa na lamang nila ka utod nga yara sa New York, nga natalana mag-abot sa Lunes ang ginahulat kag makumpleto na sila nga mga kabataan.
Suno kay Patrick, magapatigayon lamang sila sang pribado nga misa para sa amay kag ini ang ila nga ipacremate.
Kasunod sini, temporaryo nga ipabilin sa ila balay ang iya nga urn tubtob nga mahuman na ang mausoleum, nga sarang naman nga mabisitahan sang mga nagpalangga sa ila nga amay.
