Ginlubong na sa Libingan ng Mga Bayani sa Taguig City si the late Juan Ponce Enrile kahapon sang hapon.
Si Enrile ang gindesignar anay bilang former defense minister, Senate President, kag Chief Presidential Legal Counsel.
Nagtambong sa interment ceremony si Department of National Defense (DND) Secretary Gilberto Teodoro, Jr., mga kabataan ni Enrile nga kanday Katrina kag Jack, kag iban pa nga miyembro sang pamilya.
Madumduman, Nobyembre 13 sang napatay si Enrile sa edad nga 101.
Samtang ginpamatukan sang nagkalain-lain nga human rights groups kag indibidwal ang paglubong sa anay opisyal sa libingan ng mga bayani.
Suno sa mga ini, indi angayan si Enrile sa isa ka “hero’s burial” bangud sa mga paglapas sa kinamatarong sang tawo sadtong panahon sang Martial Law.
Wala nakumporme si Bayan Muna Chairman Atty Neri Colmenares nga ginlubong si former Defense Minister, Senate President kag Chief Presidential Legal Counsel, Juan Ponce Enrile sa libingan ng mga Bayani.
Sa interview sang Bombo Radyo Bacolod kay Colmenares, indi dapat nga ilubong didto si Enrile bangod indi ini maayo nga modelo sa mga kabataan.
Suno diri, sadto si Enrile ang isa sa nagplano sang Martial Law.
Nadumduman man ni Colmenares nga sa edad nga 18 anyos bilang miyembro sang Student Catholic Action, gindagdagan siya sang arrest warrant nga may perma ni Enrile bangod lang sa panawagan nila sadto nga ibalik ang student council sa mga buluthuan.
Ginpreso si Colmenares kag naeksperyesnyahan sini nga gintorture sa lamharon nga edad.
Dugang pa sini, si Enrile man ang nagplano sang coup de etat batok kay late president Cory Aquino.
Pahayag ni Colmenares, sala ang basehan nga bangod kay malawig na ini sa gobyerno, siya ang mahimo na nga ilubong sa Libingan ng mga Bayani.
Samtang, nakita man sini nga ang paglubong kay Enrile kag former President Ferdinand Marcos Sr sa Libingan ng mga Bayani ang kaangay nga nagahatag sang mensahe nga mga bagani ang nagplano kag nag-impose sang Martial Law.
