Gindul-ong na sa ulihi nga palahuwayan sanday Msgr Felix Pasquin kaupod si Rev Fr Romeo Empestan kahapon.
Alas 2:00 sang hapon kahapon, ginpangunahan ni Bishop Patricio Buzon ang misa sa San Sebastian Cathedral kag alas 4:00 sang hapon gindala kag ginlubong ang duha ka mga nagtaliwan nga pari sa Bacolod Memorial Park.
Madamo ang nagtambong kag nag-upod agud sa paglubong kanday Msgr Pasquin kag Fr. Empestan.
Madumduman nga kilala si Msgr Pasquin bangud sa kaayo sini kag dako man ang nangin kabahin sini sa Bombo Radyo Philippines bangud mahapos ini palapitan sa tion sang kinahanglan.
Antes pa ini nagtaliwan nagpangayo pa ini sang dugo kasunod sang pag-admit sini sa ospital kag nakahatag pa ini sang mensahe para sa paskwa kag bag-ong tuig.
Isa man si anay Bacolod City Mayor Evelio “Bing” Leonardia ang nagkumpanyar kag nagdul-ong kay Msgr. Pasquin sa ulihi sini nga palahuwayan.
Sa interview sang Bombo Radyo Bacolod kay anay Bacolod City Mayor Evelio “Bing” Leonardia, indi lang pari ang pagkabig sang mga ini sa nagtaliwan nga si Msgr Felix Pasquin kundi isa na kaabyan kag palangga nila ini sang iya nga asawa.
Suno kay Leonardia, indi lang pamilya kag mga abyan ang nagbisita sa haya kag nagdul-ong sa nagtaliwan nga pari sa ulihi nga palahuwayan kundi kalakip na ang mga madamo nga tawo nga ginserbisyuhan sini.
Suno sa anay alkalde ang kadamuon sang nagkumpanyar ang nagapakita lamang kung ano kaayo si Msgr Pasquin sang ini ang buhi pa.
