Natalana nga igalunsyar ang P20 per kilo rice program sa Bacolod City bwas.
Ini ang patigayunon sa Burgos Public Market.
Sa interview sang Bombo Radyo Bacolod kay Secretary to the Mayor Atty. Marty Go, ang launching sang programa ang patigayunon alas-9:00 bwas sa aga sa nasambit nga merkado.
Magabaligya man sang tag-P20 kada kilo nga bugas sa Bacolod Central Market kag Libertad Public Market.
Pangunahan mismo ni Agriculture Secretary Francisco Tiu Laurel Jr. ang launching sang programa.
400 ka sako sang bugas ang temporaryo nga ginpadala sa Bacolod City Government Center nga iga-repack sang Bacolod City Cooperative and Livelihood Development Office.
Ini ang ginputos sa napulo ka kilo, apang may mga ginagmay man nga putos para sa mga magabakal sang tingi-tingi samtang may-ara man sang sinako agud sa merkado na lamang kilohon kun kinahanglan.
400 ka sako kada adlaw ang ipadala sang National Food Authority paagi sa Food Terminal Incorporated kag tulungaon sa tatlo ka merkado tubtob nga maubos ang gin-procure nga 5,880 ka sako.
Apang hinali nga kulabos ang 400 ka sako kada adlaw, mahimo man sila mag-request sang dugang.
Suno kay Go, una anay nga ibaligya ang P20 kada kilo nga bugas sa tatlo ka mayor nga merkado, apang sa masunod nga semana, magapadala naman sila sang bugas sa clustered Barangay.
Samtang kun maubos naman ang 5,880 ka sako nga inisyal nga ginbakal, liwat nga magadihon sang purchase request ang Bacolod City
Pahanumdom ni Go, may guidelines ang Department of Agriculture para sa distribusyon kun sa diin ang makabakal lamang amo ang mga indigents, persons with disability, senior citizen, kag solo parents.
Tubtob lamang sa napulo ka kilo ang sarang mabakal sang kada pamilya sa isa ka semana ukon 40 kilos sa isa ka bulan.
Sa mga magabakal, kinahanglan lamang nga magpresentar sang isa ka valid government ID.
Ang bugas nga ibaligya sa balor P20 ang 25 percent broken apang mapasalig nga ini ang freshly milled.
