Ginakatingala ni Negros Occidental 5th District Representative Atty Dino Yulo kun ngaa indi aplikable sa sugar industry sang Negros Occidental ang “law of supply and demand”.
Sa interview sang Bombo Radyo Bacolod sa kongresista, naghatag ini sang previledge speech sa Congressional hearing angod sa problema nga ginapangatubang sa karun sang mga magagmay nga sugar farmers.
Suno kay Yulo, baldado sa karun ang sugar industry bangod sa manubo nga purisa kag tuman ka barato nga bakal.
Para sa kongresista, ini ang indi nagakaangay bangod kun law of supply and demand ang basehan, kuntani nagasaka ang presyo sang kalamay kun kulang ang supply.
Paathag sini nga ang 45-day buffer stocks sang raw sugar na sa karun ang ginagamit.
Samtang bastante naman ang supply sang refined sugar.
Nagapati si Yulo nga may-ara sang nagamanipular sang presyo.
Sa karun ang millgate price ang nagahamboy lamang sa P2,470 tubtob P2,500, samtang ang dapat nga standard rate ang yara sa P2,700 tubtob P2,800.
Paathag sang kongresista nga ini ang iya ipasaka sa House Committee on Food Security.
