Nagapanawagan ang Bacolod City Veterinary Office sa mga pumuluyo nga mangin aware sa animal cruelty nga nagakatabo sa karun.
Mahibaluan nga may itom nga layaw nga kuring nga gin-indian target sa tuo nga mata sa bahin sang Brgy 16, Bacolod City.
Sa interview kay Dr. Jec Cabuguason, Assistant City Veterinarian, Bacolod City Veterinary Office, wala pa tubtob sa karun nakit-an ang kuring apang ini man ang masami nga nagalibot-libot sa area.
Pahayag ni Cabuguason, wala sa karun sang concrete nga data ang City Veterinary Office sa lista sang mga sapat nga ginasakit bangod wala man sang may nagafile sang report.
Gin-athag man sini nga ang animal abuse ang indi lang kun gin-indian target ukon ginsakit ang sapat, apang nasulod man diri ang paghigot sa sapat sa gwa kag wala sang balay, wala ginahatagan sang insakto nga pagkaon kag iban pa.
Suno pa diri, kun lantanwon madamo sang makabig nga pagpang-abuso bangod madamo sang iresponsable nga mga owners nga wala naka-intindi sang ila obiligasyon.
Samtang, nagpanawagan naman ang manager sang BACH Project nga kuntani tabugon lang ang sapat kag indi na pagsakiton pa.
Sa interview sang Bombo Radyo Bacolod kay Christopher John Bertol, kun may mawitness nga pagpang-abuso sa sapat dapay ireport gid ini agud mahatagan sang nagakaigo nga tikang.
Suno diri, unahon gid nila ang safety sang sapat kag kun may yara sang witness sa natabo, mahimo gid sila nga magfile sang kaso.
Dugang pa sini, indi nila luyag nga mangin normal ang pagpanakit sa mga sapat nga mas dilikado pa kun sa tawo na himoon ang pagpang-indian target.
