Magapagwa sang position ang League of Provinces of the Philippines ukon LPP batok sa bag-o nga pagsulundan sang National Inter-Agency Task Force (IATF) nga indi na magpaidalom sa mandatory 14-day quarantine ang returning overseas Filipinos nga negatibo ang RT-PCR test halin sa Manila.
Sa interview sang Bombo Radyo Bacolod kay Governor Eugenio Jose “Bong” Lacson, wala ini nagakomporme sa bag-o nga pagsulundan sang National Inter-Agency Task Force (IATF) nga indi na pagpaidalom sa 14 days mandatory quarantine ang mga ROF.
Santo sa bag-o nga pagsulundan, mangin obligasyon sang mga receiving LGU nga idul-ong sa tagsa ka mga panimalay ang mga Returning Overseas Filipinos apang kinahanglan sang ROF nga magreport sa Barangay sa tion nga maglain ang ila pamatyag.
Suno kay Lacson, may mga ROF nga nagapositibo sa COVID-19 sa tion nga magpauli sa probinsya.
Ginpahayag man sini nga mas madamo ang malatnan kun magderecho sa tagsa ka panimalay ang mga ROF.
Bangud sini, mapasa sang position ang LPP bangud kalabanan sang mga gobernador sa Pilipinas ang nagapamatok sa bag-o nga pagsulundan.
Nagpanindugan si Lacson nga ang mga ROF ang mapaidalom gid sa local health protocols kasubong sang mga APOR kag LSIs nga nagapauli sa probinsya.
