Ginpasalig na sang Bacolod City Water District – Primewater nga gilayon nila nga himuan sang solusyon ang nagaleak nga water pipe sa taytay sa Brgy Mansilingan, Bacolod City.
Sa interview sang Bombo Radyo Bacolod kay Councilor Bobby Rojas, chairperson sa Committee on Energy and Public Utilities sa Sangguniang Panlungsod, matapos ginpalab-ot sa iya sang Bombo Patrol Reporter ang isyu, ini ang iya gilayon nga ginbutang sa priority list.
Ginpakadtuan sini kaina ang area sa iya nga staff, kag nakita mismo sang mga ini nga nagkalaguba na ang semento bangod sa masami nga basa tuga sang leak sa tubo.
Nahibaluan nga Disyembre pa sang umpisa nga nagleak ang tubo, kag madamo naman sang nagreklamo tuhoy diri.
Apang bangod wala gihapon sang solusyon, pila sa mga pumuluyo ang nagdangop na sa Ipa-Bombo Ta segment sang Bombo Radyo Bacolod.
Suno kay Rojas, ginforward na niya ang mga litrato kag video sang problema sa pamunuan sang BACIWA-Primewater, nga nagpasalig na nga gilayon niya nga himuan sang tikang ang problema.
Pahayag sang konsehal nga kinahanglan gilayon nga masolusyonan ang problema bangod ang leakage ang nagadugang sa pagnubo sang water supply nga nagasulod sa area.
Dugang pa sini nga delikado man sa motorista ang basa nga dalan, bangod ini ang madanlog kag yara ang risgo nga mag-awas ang mga motorista sa taytay.
Pasalig ni Rojas nga siya mismo ang magamonitor kag magapahanumdom sa BACIWA-Primewater agud madasig nga masolusyonan ang isyu.
