Nagadangat sa isa ka gatos ang reservation sang mga lechon nga baboy sa Purok Lechonan, Barangay 35, Bacolod City subong nga adlaw sang Paskwa.
Sa interview sang Bombo Radyo Bacolod kay John, chopper sa Avelino’s Lechon, alas-2:00 sang kaagahon naga-umpisa na ang mga ini sa pag-ihaw samtang alas-4:00 sang aga sila ang nagaluto na sang lechon.
Suno diri nagapabilin sa P700 ang kada kilo sang lechon, apang may pagsaka naman sa presyo sang bilog nga lechon.
Ang pinakagamay nila nga lechon nga nagadangat sa lima ka kilo ang nagabalor sang P6,500.
Suno diri, P5,500 ang presyo sang gamay nga baboy nga buhi samtang nagadangat naman sa P420 ang presyo sang isa ka sako nga uling sa Libertad Public Market.
Mahimo naman sila nga makabarato sa uling kun magbakal sang madamo kun sa diin nagapanaog ang presyo sa P380 tubtob P400.
Sa pihak nga bahin, nagadangat naman sa P12,000 ang pinakamataas nila nga presyo sang bilog nga lechon nga nagadangat sa 12 kilo ang kabug-atun.
Aminado si John nga sa masami ang ginabakal nga mga bilog nga lechon amo ang mga magagmay samtang retail naman ang pagbaligya sa dalagko.
Suno diri, dugang sa rasun sa pagsaka sang presyo sang baboy amo bangod bisan ang Manila, Cebu kag Iloilo ang lunsay sa Bacolod nagakuha sang supply sang buhi na baboy.
Wala pa magdangat sa alas-7:00 kaina sang aga, pahayag ni John nga nagdangat na sa 100 ang ila orders nga nabatun kag ini ang masarangan nila tubtob alas-2:00 sang hapon.
Suno diri, ang gamay nga lechon ang maluto sa duha ka oras samtang ang dalagko ang nagadangat naman sa tatlo ka oras kag 30 minutos.
Ini ang mahimo magsaka pa ilabi na nga magluwas sa reservation may-ara man sang mga walk-in customers.
Sa pihak nga bahin, ginalantaw naman sini nga may posibilidad nga magsaka pa sa Enero ang presyo sang lechon apang ginapangamuyo man sini nga magpabilin lamang ini sa husto nga presyo.
