Nagapati ang konsehal nga nagaserbe man legal counsel sa Bacolod Real Estate and Development Corporation (BREDCO) nga indi na kinahanglan pa magpangayo sang Resolution of No Objection (RONO) sa plano nga reclamation sang dugang nga 25 hectares para sa development sang port services.
Sa interview sang Bombo Radyo Bacolod kay Councilor Renecito Novero, sa idalum sang Comprehensive Revised Reclamation Agreement sa Bacolod City Government kag Philippine Reclamation Authority, ang BREDCO ang ginapahanugutan sa pagreclaim sang minimum nga 250 hectares sang duta kag mahimo pa magsobra sa 300 hectares.
Paathag sini nga ang pagpadala sang sulat sang BREDCO sa Sangguniang Panlungsod ang bilang pagpahibalo lamang nga sila ang magapatigayon sang reclamation.
Aminado si Novero nga may diber magkwestyon ang nagapabor ukon nagapamatok sa lihok apang dapat seguruhon ang legal basis.
Nahibaluan nga hugot nga nagapamatok ang Almana Property Development Corporation nga nagapanag-iya sang Baywalk bangod maulamid ang area sa reclamation project apisar nga ini ang ila na nga nabakal sa BREDCO.
Apang pahanumdom ni Novero, nga dapat tsekyaron sa kontrata sa pagbakal kun nakapagkit nga indi makapatigayon sang reclaimation ang BREDCO nga magasupak sa existing contract sini sa Philippine Reclamation Authority.
Ginalantaw ini nga mahimo luyag sang kompanya nga magpatigayon sang kaugalingon nga reclamation activities sa lugar, apang pahanumdom sini nga tsekyaron anay kun sila ang may kinamatarong ukon kontrata.
Nagapati si Novero nga sa pagbakal sang Almana sang propedad, nakahibalo na ini sang existing reclaimation rights sang BREDCO.
Pahanumdom sang abogado nga ang BREDCO ang nagatuman lamang sa existing nga kontrata sa Bacolod City Government kag Philippine Reclamation Authority kag ang reclamation project ang inline man sa vision ni Bacolod City Mayor Alfredo “Albee” Benitez nga mangin Super City ang Bacolod.
Pahanumdom sini nga dako na nga bahin sang ciudad ang ginreclaim kag ini ang nakahatag sang dako nga benepisyo kag sa karun natukuran na sang madamo nga mga negosyo.
Ginalantaw ni Novero nga ang pagpamatok sa reclamation project ang kaangay lamang sa pagpamatok sa tinutuyo nga mapasanyog pa ang ekonomiya sang ciudad kag mapadasig ang paglab-ot sa target nga Super City status.
Pahayag sini nga welcome sa BREDCO ang sin-o man nga luyag magpatigayon sang reclamation activities, apang ini ang mahimo sa iban nga bahin sang shoreline sang Bacolod City kag indi dapat magconflict sa existing reclamation project.
Pahanumdom sang abogado nga ang reclamation project ang indi lamang para sa BREDCO kundi dako man nga bulig sa development sang Bacolod City pati na sa bilog nga Pilipinas bangod interconnected ang business activities sa bilog nga archipelago.
