Gin-athag sang konsehal kag abogado sa ciudad sang Bacolod nga lantawon pa sang Korte Suprema ang merit sang ginfile nga petition nga nagahingyo sang temporary restraining order sa implementasyon sang Negros Island Region Act.
Sa interview sang Bombo Radyo Bacolod kay Bacolod City Councilor Atty Renecito Novero, sa pagfile sang TRO lantawon pa ang legal standing kag kun may makabig irreparable damage sa mga nagfile.
Suno sa abogado dapat pamatud-an sang mga nagfile nga sila ang legal citizen kag nagabayad sang taxes agud sila ang mahatagan sang preliminary injuction.
Kun indi mapamatud-an nga may irreparable damage ukon tuman ka dako nga kahalitan sa mga natungdan ang implementasyon sang layi, dako ang tyansa nga ini ang mabasura.
Panindugan sang mga petitioners, nga ginalakipan sang mga abogado, kaparian kag iban pa, gikan sa Siquijor kag Negros Oriental, nga wala sang ginpatigayon nga consultation kag wala nagsunod sa fundamental procedure sa pagpasar sang layi.
Apang paathag ni Novero nga indi dapat ang Office of the Solicitor General ang magaserbe nga respondent bangod ini ang abogado sang gobyerno ukon nagaseguro lamang sa constitutionality sang layi.
Sa baylo ang dapat nga ibutang nga respondents amo ang Department of the Interior and Local Government (DILG), Department of Budget (DOB) kag mga Provincial Governments nga involved, bangod sila ang sarang mamanduan sang Korte Suprema.
Paathag ni Novero nga kun Office of the Solicitor General ang ginbutang nga respondent, sarang lamang maprove ang constitutionality sang layi, apang wala sang ikasarang nga magpatuman sang Temporary Restraining Order.
