Nag-file sang appeal kahapon ang legal team ni anay Presidente Rodrigo Duterte batok sa desisyon sang International Criminal Court (ICC) Pre-Trial Chamber matapos ginkumpirmar ang mga kaso batok sa anay presidente angot sa “war on drugs” campaign sang alkade pa si Duterte sang Davao City tubtob nangin presidente sang Pilipinas.
Suno kay Atty. Nicholas Kaufman, ginahingyo nila nga sila ang tugutan nga mag-apelar sa desisyon nga iya gintawag “most bizzare” ukon “Kafkaesque” (Kaf-kah-esk) ukon mabudlay intiendihon.
Ginpanindugan sini nga daw kaangay nga gina-apinan sang pre-trial chamber ang prosekusyon kag wala ginakonsiderar ang kinamatarong ni Duterte sa patas nga trial.
Ginkwestyon man sang kampo sang depensa ang ginpahayag kakulang sang detalye sa mga alegasyon kag ang kapaslawan sa pagsambit sang ebidensya sa desisyon.
Samtang, ginpahayag naman ni anay Chief Presidential Legal Counsel Atty. Salvador Panelo nga “pre-judged” na ang kaso kag iya man ginsambit ang pagkunsabo sa tunga sang ICC kag sang subong nga administrasyon.
Ginpanginwala man sang Malacañang ang mga alegasyon.
Suno kay Palace Press Officer Undersecretary Atty. Claire Castro, ginpasaka ang mga kaso sadtong 2017, antes pa man nagpungko si Presidente Ferdinand Marcos Jr., kag ginpahayag sini nga wala sila sang koneksyon sa ICC.
