Gin-athag sang alkalde sang ciudad sang Bacolod nga wala ginapahanugutan ang mga sidewalk vendors nga magbalik sa ila daan nga ginapwestuhan magluwas sa Bacolod City Public Plaza.
Sa interview sang Bombo Radyo kay Mayor Evelio “Bing” Leonardia, ginklaro sini nga wala siya naghatag sang mandu nga sarang makabaligya sa sidewalk ang mga vendors bangud holiday season.
Suno kay Leonardia, ang Executive Order 38 ukon Paskwa sa Plaza lang ang iya nga ginpatuman kun sa diin ginapahanugutan ang mga street vendors nga magbaligya sa plaza sang ciudad apang kinahanglan nga magkuha sila sang special permit.
Suno sa iya, gintugutan niya ini bangud sa paskwa apang nagapangabay ini nga indi pag-abusaron ang nasambit nga order.
Ginkompirmar man ni Executive Assistant Ernie Pineda nga may yara na sang 135 ka mga street vendors nga nagaproseso sang ila special permit agud nga makabaligya sa Bacolod City Public Plaza.
Suno kay Pineda, ang rason kun ngaa nagpagwa sang executive order 38 ukon Paskwa sa Plaza amo ang maakomodar ang mga vendors sa downtown area.
Ginpahayag man ni Councilor Israel Salangga nga handom nila nga mangin festive ang pagselebrar sang paskwa sa ciudad gani ginpahanugutan ang pagbutang sang mga rides sa plaza.
Suno kay Salangga, masanag katama ang plaza sa karun bangud ginbutangan ini sang mga Christmas lights bangud kada gab-i, may yara sang makalilingaw nga palagwaon.
Suno sa iya, tuyo sini nga kun magkadto ang mga pumuluyo, indi lang sila mamakal, kundi maga-enjoy man.
