Patay ang isa ka lesbian kag empleyado sang Mag-aso falls resort matapos nga gintiro-patay sang wala matumod nga suspek sa Purok, Dug-anon, Brgy Oringao, Kabankalan City kahapon, Abril 21.
Ginkilala ang biktima kay Myra Belando kag residente sang nasambit nga lugar.
Sa interview sang Bombo Radyo Bacolod kay Police Lt. Col. Roberto Indiape, hepe sang Kabankalan City Police Station, ang biktima ang padulong na sa iya ulubrahan kag samtang nagatravel sakay sa iya nga motorsiklo, gintiro ini sang wala pa makilal-an nga suspetsado.
Suno kay Indiape, ang biktima ang nakaangkon sang pilas sa ulo nga mahimo nga gintunaan sang kamatayon sini.
Suno sa hepe, ginpahayag nga may mga live-in partners man ang biktima kag ginalantaw nga motibo sa pagpatay sa biktima ang personal grudge.
Narekober sa lugar ang apat ka fired cartridges sang 9mm kag isa ka cartridge sang nasambit nga firearms.
Nagpanawagan man si Indiape sa mga pumuluyo ukon sin-o man nga nakasaksi sa krimen nga makig-angot lamang sa ila agud nga maghatag sang ihibalo sa nagluntad nga krimen kag ginapasiguro sini taguon ang identity.
Samtang, nagapadayon pa ang imbestigasyon sang kapulisan angut sa motibo sang krimen kag identity sang suspek.
