Ginakonsiderar ni Bacolod City Mayor Alfredo “Albee” Benitez ang letter of intent sang isa ka kompanya sa Manila nga luyag nga mangin water concessionaire sa ciudad sang Bacolod.
Madumduman nga tuman ka damo ang mga nagareklamo bangod sa kakulang sang supply sang tubig sa ciudad gikan sa pagdumala sang Bacolod City Water District (BACIWA) – Prime Water.
Kun sa diin may pila ka mga Barangay ang wala gid sang magamit nga tubig kag may-ara man sang naga-antos sa lubog kag maninit nga tubod sang tubig sa gripo.
Panawagan ni Mayor Albee sa mga pumuluyo nga magpadala sa City Government sang sulat natuhoy sa experience sa water supply, ibutang ang area (Purok kag Barangay), oras nga nadulaan sang tubig, sitwasyon sang nagakabatun nga serbisyo (mahinay ang tubod, mabaskog ukon higko), agud may-ara sang listahan.
Pahayag sang alkalde nga sa pagpresentar sang BACIWA – Prime Water sa iya, colorful ukon dako ang improvement sang ila nga performance kun ipaanggid sa nakaligad.
Apang luyag sang alkalde nga makita ang reaksyon mismo sang mga pumuluyo nga nagabatun sang serbisyo.
Isa man sa gina-antos sang mga pumuluyo bangod madamo ang padayun nga nagabayad sang minimum rate sang balayran sa tubig, nga nagadangat sa masobra P200 apang wala man makapulos sa serbisyo.
Bangod sini, ginapaminsaran naman sang alkalde ang pagbatun sa proposal kag magpirma sang kasugtanan sa nasambitan nga kompanya.
