LGU sang La Castellana, nabaton na ang P10 million nga financial aid gikan sa Office of the President

Dako ang pasalamat ni La Castellana Mayor Añejo Nicor matapos mabatun ang P10 million financial aid gikan sa Office of the President.

Sa interview sang Bombo Radyo Bacolod sa alkalde, kulang nagid katama ang ila nga budget bangod sa asod-asod nga mga kalamidad nga nasuguran sa paglupok sang Bulkan Kanlaon, mga pag-alburuto sang bulkan kag lahar flow kasubong man ang baha nga tuga sang Bagyo TINO.

Suno kay Nicor, dako nga bulig ang P10 million nga magamit para sa fuel, pagkaon kag pang-adlaw adlaw nga kinahanglanon sang mga biktima sang kalamidad, partikular na ang mga partially kag totally damaged ang balay.

Magamit man ang budget sa pagbutang sang mga temporaryo nga maagyan sang mga lugar nga nagub-an sang taytay.