Masobra 3,000 lang ka mga corn farmers sa Region 6 ang maka-avail sang P3,000 fuel subsidy nagikan sa gobyerno paagi sa fuel discount card.
Sa interview sang Bombo Radyo kay DA Region 6 director Remelyn Recoter, masobra 40, 000 ang numero sang corn farmers sa Western Visayas apang 3,222 lang ang allocation para sa rehiyon bangud P500 million lang ang alokasyon sa bilog nga pungsod.
Sa karon, nakasumiter na ang mga local government units sang masterlist sang mga corn farmers apang igavalidate pa ang listahan bangud indi tanan nga miyembro sang asosasyon ang makabaton kundi ang nagrenta lang sang makinarya nga suportado sang resibo.
Sa bahin sang DA suno kay Recoter, wala na sang problema sa proof of ownership bangud may Deed of Donation kag Memorandum of Agreement.
Nagalaom man ini nga madownload na ang pondo sa Development Bank of the Philippines agud nga madihon ang Memorandum of Agreement.
Magahatag man sang accreditation sa mga fuel stations nga magabaton sang fuel discount card bangud indi cash ang ihatag sa mga corn farmers kundi fuel discount card.
Suno kay Recoter, kinahanglan nga registered ang farmer sa Registry System for Basic Sectors in Agriculture (RSBSA) agud nga maka-avail sang fuel subsidy.
