Ginpaidalom na sa Signal No. 2 ang pila ka ciudad kag banwa sa probinsya sang Negros Occidental samtang nagapalapit sa probinsya ang Typhoon Tino.
Sa interview sang Bombo Radyo kay Melvin Fierro, weatherman sang Negros Occidental Operations Center, santo sa 11:00 am weather forecast, ang bagyo Tino yara sa 440 km East sang Guiuan, Eastern Samar kag dala sini ang kabaskugon sang hangin nga nagadangat sa 110 km/h kag pagmadlos nga tubtob sa 135 km/h.
Ini nagahulag sa West southwestward nga dereksyon sa kadasigon nga 30 km/h.
Suno diri, napaidalom na sa Signal No. 2 ang northern kag central portion sang Negros Occidental nga ginalakipan sang Escalante City, Toboso, Calatrava, Salvador Benedicto, Himamaylan City, Kabankalan City, Ilog, Binalbagan, Isabela, Moises Padilla, San Carlos City, La Castellana, Hinigaran, Pontevedra, La Carlota City, San Enrique, Valladolid, Pulupandan, Bago City, Murcia, Bacolod City, Talisay City, Victorias City, Enrique B. Magalona, Silay City, Cadiz City, Manapla, kag Sagay City.
Samtang, Signal No. 1 naman sa na bailin nga bahin sang probinsya.
Suno kay Fierro, kaangay nga magkapareho ang bagyo Tino kag Yolanda apang manubo lang ang category ni Tino nga yara sa Typhoon category samtang si Yolanda naman yara sa Super Typhoon category.
Pahayag ni Fierro, lauman na nga maeksperyensyahan ang pag-ulan subong nga hapon tubtob bwas sa aga.
Apang, bwas nga adlaw, maeksperyensyahan ang makusog nga huyop sang hangin kag madamol nga ulan humalin sa aga tubtob sa udto.
Dugang pa sini, dako ang posibilidad nga maglab-ot sa Signal No. 4 ang tropical cyclone wind signal kun mapabilin sang Typhoon Tino ang iya kabaskugon.
Abiso sini sa mga pumuluyo nga mangin alerto, magulu-aligmat sa pagsaka sang tubig kag magpreparar sa posibile nga dako nga halit sang bagyo.
