Target sang Department of Education division of Bacolod City nga mapanagtag ang libre nga school supplies para sa mga Kindergarten kag Elementary Pupils antes paman ang opening sang klase.
Sa interview sang Bombo Radyo Bacolod kay Dr. RJ Paglumutan, may natalana nga P29 million nga budget para sa pagpanagtag sang school supplies sa 67,000 ka mga estudyante.
Ang releasing ang plano nga patigayunon Hunyo 9 tubtob 13, kadungan sang Brigada Eskwela.
Ang opening sang klase ang nakaschedule sa Hunyo 16.
Suno kay Paglumutan, apat ka notebook, tatlo ka rolyo sang pad paper, duha ka box sang lapis, duha ka tahal kag madamol nga plastic envelope nga may zipper para sa Kindergarten.
Napulo ka notebook, tatlo ka rolyo sang pad paper, duha ka box sang lapis, duha ka tahal kag plastic envelope naman para sa Grade 1 tubtob Grade 3.
Samtang 10 ka notebook, intermediate pad, 12 ka black kag 12 ka red nga ballpen, duha ka lapis kag plastic envelope naman ang sa Grade 4 tubtob Grade 6.
Ini santo sa DepEd Division Memo no. 334 series of 2025.
Suno kay Paglumutan, wala sila nagbakal sang bag, bangod sa budget nga P300 tubtob P400 sa kada estudyante, baratuhon nga bag lamang ang ila nga mabakal.
Pahayag sini nga madasig nga maguba ang baratuhon nga bag, partikular na sa mga nagadugsing nga kabataan.
Sa baylo plastic envelope nga damol na lamang ang ila ginhatag nga sarang man masudlan sang mga pagkabutang sang mga estudyante.
Ginaseguro naman nila nga temprano mapanagtag ang libre nga school supplies indi kaangay sang nakaligad nga tuig nga nahatag duha ka semana na sang mag-umpisa ang klase.
Ang pondo ang ginkuha naman sa special education fund sang Bacolod City Government
