Target sang ciudad sang Bacolod nga makapanagtag sang libre nga school supplies sa mga estudyante sa pampubliko nga eskwelahan sa una ukon ikaduha nga semana sang Agosto.
Sa interview sang Bombo Radyo Bacolod kay Councilor Al Victor Espino, chairperson sang Committee on Education sa Sangguniang Panlungsod, nasuguran na ang procurement process matapos nga macertify sang City Budget Officer kun sa diin magamit ang special education fund.
Paathag ni Espino nga ang Department of Education (DepEd) ang nagahimo sang purchase request, samtang ang iya nga obligasyon amo lamang ang pagpangita sang pondo.
Aminado man ini nga siya ang responsible kun ngaa wala nakapanghatag sang libre nga school supplies sang School Year 2023-2024.
Ini bangod nakita niya nga ang P15 million nga budget kun tungaon sa 72,000 tubtob 74,000 nga mga estudyante sa elementary ang yara na lamang sa balor P211.
Suno diri, ang P211 ang tuman ka gamay ilabi na nga tuman man ang pagsaka sang presyo sang school supplies tinalikdan nga School Year kun sa diin ang sadto P15 nga notebook ang nagsaka na sa P30 pasaka.
Plano man ni Espino nga amyendahan ang masobra 10 ka tuig na nga ordinansa agud mapasaka ang P15 million nga budget kag mangin P30 million, bangod tuman man ang pagsaka sang mga school supplies.
