Magapatigayon sang libre nga theoretical driving course ang Land Transportation Office District Office kaupod ang Local Government Unit sang Bacolod City sa Mayo 15 tubtob 16.
Sa interview sang Bombo Radyo kay LTO Head Renato Novero, ang nasambit nga aktibidad ang patigayunon kadungan sang Founding Anniversary sang LTO.
Suno diri, sa lobby sang Bacolod City Government Center patigayunon ang theoretical driving course kag may maximum nga 200 participants.
Suno kay Novero, dapat magpapre-register sa city admin office ang luyag nga magpartisipar, kag magprocess sa online Land Transportation Management System (LTMS) portal agud makakuha sang account number agud nga ila makontrolar ang numero sang participants.
Maka-avail diri ang naga-edad sang 16 anyos nga dapat may dala nga birth certificate ukon NSO copy.
Samtang kun married naman ang isa ka indibidwal dapat nga may valid ID ini nga na issue nga nakasal na.
Suno kay Novero, ang theoretical driving course ang isa sa mga requirements agud makaproseso sang driver’s license ilabi na sang student permit kag kun sa driving school ini kuhaon, nagadangat sa P1,000 ang balayran.
Lauman naman suno sa iya nga magapatigayon sila sang kaangay nga aktibidad sa nagkalain-lain nga banwa kag ciudad sa probinsya.
Sa mga luyag magparehistro, sarang nga makapadulong sa City Administrator’s Office sang Bacolod.
