Patay ang isa ka licensed criminologist matapos nga maaksidente sa National Highway Crossing Aguisan, Brgy. Aguisan, syudad sang Himamaylan, Sabado sang kaaagahon, Mayo 31.
Ginkilala ang biktima kay Alyas Jether, 24 anyos kag residente sang Barangay Aguisan, Himamaylan City.
Sa interview sang Bombo Radyo Bacolod kay Police Lt. Col. Mark Anthony Grande, hepe sang Himamaylan City Police Station, ang driver sang Suzuki Raider 155 CC amo si Alyas Jether, 24 anyos kag residente sang Barangay Aguisan samtang ang backrider sini si Alyas Khaye nga residente man sang nasambit nga lugar.
Samtang ang driver naman sang Isuzu MUX amo si Alyas Glen nga residente sang Barangay Nanga, Guimbal, Iloilo.
Suno kay Grande ang motor nga ginamaneho ni Alyas Jether ang nagabiyahe halin sa Barangay Aguisan padulong sa Hacienda Paco, Barangay Aguisan samtang ang SUV nga ginamaneho ni Alyas Glen ang nagabiyahe halin sa Bacolod padulong sa Kabankalan City.
Sang nakalab-ot sa lugar sang insidente, nagliko ang motorsiklo nga ginamaneho sang biktima kag aksidente nga nakabunggo sa SUV nga ginamaneho ni Alyas Glen.
Bangud sa impact nahulog ang biktima kag angkas sini sa sementado nga dalan kun sa diin nakaangkon ang mga ini sang mga pilas sa nagkalain-lain nga bahin sa ila lawas.
Gindala ang mga ini sa ospital apang si alyas Jether ang gindeklarar nga dead on arrival bangud sa samad sa ulo samtang ang angkas naman sini ang nakaangkon sang minor injuries.
Ginalantaw nga nagpamiesta ang biktima kag ang backrider sini sa Barangay Aguisan
Nakagwa naman ang driver sang MUX matapos maserbehan ang reglementary period kag wala pa sang finality angot sa desisyon sang pamilya sang biktima apang may yara na sang inisyal nga pagestoryahanay ang magtimbang nga bahin.
