Wala naglaom ang isa ka licensed Electronics and Communication Engineer nga mangin second placer ini sa Master Electrician Licensure Examination subong nga bulan.
Sa interview sang Bombo Radyo kay Ersan Gonzales Natuel nga tumandok sang Silay City, Negros Occidental kag graduate sang STI West Negros University diri sa Bacolod, iya lang ginhandum nga makapasar sa board exam nga ginpatigayon sang September 4 kag makasulod bisan sa ikawalo tubtub ikanapulo nga pwesto gani wala gid ini nag-expect nga magpangaduha sa tanan nga mga passers sa may pinakamataas nga rating, base sa resulta nga naggwa kagab-i.
Si Natuel ang nagatrabaho sa Asia Brewery sa Laguna bilang electrical and instrumentation supervisor sa sulod sang pila na ka tuig.
Nagself-review lang si Natuel bangud dungan ang iya trabaho kag review kun sa diin nagabasa lang ini sang iya nga notes antes magtulog kada gab-i ukon samtang yara sa salakyan sang ila nga kompaniya.
Siya ang naggraduate sa STI West Negros University sang tuig 2009 kag siya ang first-taker sang Master Electrician Licensure Examination.
Ang misis sini ang yara sa Silay apang nagabisita man ini sa iya sa Laguna pila ka beses sa isa ka tuig ukon siya man ang nagapauli diri sa probinsya.
Wala naman niya ginpahibalo sa iban nila nga himata nga siya ang magakuha sang board exam agud nga mangin tayuyon ang iya nga pagreview gani nakatumbo ini kagab-i sang iya nahibaluan nga siya ang nagpangaduha sa mga passers.
Suno sa iya, dako nga bulig sa iya ang iya nga eksperyensya sa ECE sa pagkapasar sa board exam.
Nagpanugyan naman ini sa iban nga nagaplano nga magkuha sang pasinawan nga magtuon sang maayo, magtuo sa Mahal nga Makaako kag panumdumon nga ginahimo ang tanan para sa kaugalingon kag sa pamilya.
