Magapadulong subong nga adlaw sa opisina sang Land Transportation Franchising and Regulatory Board Region 6 (LTFRB 6) ang duha ka lider sang transport groups nga nagpatigayon sang silent protests sa Bacolod City Government Center sang tinalikdan adlaw.
Ini agud nga ipasa ang resolution nga gin-aprubahan sang Sangguniang Panlungsod kag ginalauman nga mangin palaagyan agud nga mapanawagan sa LTFRB nga aprubahan ang ila nga prangkisa.
Suno kay Lilian Sembrano, chairperson sang Kabacod-Piston, ginakabig na nila nga kadalag-an ang pagdihon sang resolusyon sa bulig man sang Sangguniang Panlungsod kag sa presiding officer nga si Bacolod City Vice Mayor El Cid Familiaran.
Suno kay Sembrano, alas-10:00 subong nga aga ang appointment nila kay LTFRB Region 6 Director Richard Osmeña.
Suno diri, ipresentar nila ang resolusyon sang SP kag ipanawagan ang immediate renewal sang ila nga prangkisa.
Dugang pa sini, aminado man ang LGU nga manubo ang numero sang authorized units sang modernized jeepney ang nagabiyahe sa ciudad sang Bacolod.
