Matapos ang madugay nga surveillance sang kapulisan, nadakpan na ang ginapahayag leader sang Epogon Organized Crime Group nga ginaalegar naga-operate sa bilog nga isla sang Negros.
Si Francisco Dela Cruz Epogon, 30 anyos, residente sang Sitio Manluy-a, Brgy. San Jose, Sipalay City ang nadakpan sa Sitio Patic, Purok 2, Brgy. Isio, Cauayan, matapos ginserbehan sang warrant of arrest, alas-5:50 kahapon sang hapon.
Sa interview sang Bombo Radyo Bacolod kay Police Major Lowell Garinganao, hepe sang Cauayan Municipal Police Station, may kaangtanan sa kaso nga Robbery kag Violence Against or Intimidation of Persons Committed by a Band nga gin-issue ni Judge Rodney Magbanua sang RTC 6, Branch 61, 6th Judicial Region Kabankalan City, nga napetsahan February 28, 2020 ang ginserbe kay Epogon.
P100,000 naman ang gintalana nga pyansa para sa temporaryo nga kahilwayan sang suspetsado.
Ini ang may kaangtanan sa pagpanghold-up sang natungdan sa 6th district sang Negros Occidental.
Si Epogon ang nadakpan matapos magbisita sa balay sang iya kahagugma.
Suno kay Garinganao, ginkabig nga armed and dangerous si Epogon gani ginhandaan sang Cauayan Police Station ang operasyon.
Nakuha naman sa paghinakop sini ang isa ka pineapple type grenade nga nabutang sa iya nga bag.
Suno kay Garinganao, may nakita sa cellphone sang suspetsado nga mensahe nga may yara sang nagpahibalo nga kinahanglan sini nga magpalayo bangud nakahibalo na ang kapulisan nga ang grupo sini ang may kahimuan sang nagsunod-sunod nga krimen ilabi na ang pagpangransak sang balay nga may kuarta.
Kagab-i, nagpadulong si Bacolod City Police Office City Director Police Col. Henry Biñas, hepe sang sang Bacolod City Police Station 4, kag ang mga imbestigador sa banwa sang Cauayan agud magpangusisa sa background ni Epogon.
Nahibaluan nga ang Epogon group ang ginalantaw man nga suspetsado sa pagsulod sa balay sang Belgian national nga si Carl Nolens sa Villa Angela Subvision, Brgy. Villamonte, Bacolod City, sang tinalikdan nga semana kun sa diin ila nga ginpatay ang tag-iya.
