Ginkumpirmar sang action officer sang inter-agency task force sang Sagay City nga nagpositibo sa coronavirus disease ang tribal leader sang mga badjao sa ciudad.
Sa interview sang Bombo Radyo kay Atty. Ryan Bunghanoy, may yara sang kapin 38 ka mga badjao nga temporaryo nga nagapuyo sang Brgy. Taba-ao, Sagay City kag bangud sa programa sang probinsya nga pabalikon ang mga ini sa ila lugar, sila ang ginpaidalum sa swab test sang Nobyembre 30.
Suno kay Bunghanoy, nagwa ang resulta sang Miyerkules kag sa 38 ka mga badjao, isa lang ang nagpositibo kag ini ang ila mga tribal leader.
Nahibaluan nga naganegosyo ang pasyente sang alahas sa Bacolod, Cadiz kag Sagay.
Suno sa action officer, ang asawa kag duha ka mga kabataan sang tribal leader nga iya nakaclose contact ang ipaidalum man sa RT-PCRtest sa Disyembre 5 ukon 6.
Sa karun, suno diri, may yara sang 76 ka mga aktibo nga kaso ang ciudad.
